ឯកឧត្តមបណ្ឌិត សុខ ប្រសិទ្ធិ អញ្ជើញចូលរួមអង្គកឋិនទាន.....

ឯកឧត្តមបណ្ឌិត សុខប្រសិទ្ធិ និងថ្នាក់ដឹកនាំ សមាជិក សមាជិកាសម្ពន្ធយុវជនអាហារូបករណ៍ ស២ បាននាំយកអង្គកឋិនទានមហាសាមគ្គី វេរប្រគេនដល់ព្រះសង្ឃនៅវត្តពោធិ៍អណ្ដែត ហៅវត្តក្បាលទាហ៊ាន ខេត្តពោធិ៍សាត់ ដើម្បីលើកស្ទួយព្រះពុទ្ធសាសនា និងពង្រឹងសាមគ្គីភាព

ផ្សាយចេញពីរាជធានីភ្នំពេញ/ខេត្តពោធិ៍សាត់)៖ ពិធីបុណ្យកឋិនទានសាមគ្គីដែលជាបុណ្យប្រពៃណីជាតិដ៏សំខាន់របស់ពុទ្ធសាសនិកជនខ្មែរ តែងត្រូវបានប្រារព្ធឡើងជារៀងរាល់ឆ្នាំក្រោយពិធីបុណ្យចេញវស្សា។ ជាក់ស្តែង កាលពីនារសៀលថ្ងៃសៅ ១២កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី០១-ទី០២ ខែវិច្ឆិកាឆ្នាំ២០២៥ ឯកឧត្តមបណ្ឌិត សុខប្រសិទ្ធិ ទីប្រឹក្សាផ្ទាល់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជារដ្ឋលេខាធិការក្រសួងព័ត៌មាន ព្រមទាំងថ្នាក់ដឹកនាំ និងសមាជិក សមាជិកា សម្ពន្ធយុវជនអាហារូបករណ៍ ស២ បានអញ្ជើញចូលរួមជាអធិបតីក្នុងពិធីបុណ្យកឋិនទានមហាសាមគ្គីមួយយ៉ាងអធិកអធម នៅវត្តពោធិ៍អណ្ដែត ហៅវត្តក្បាលទាហ៊ាន ស្ថិតក្នុងឃុំឈើតុំ ស្រុកក្រគរ ខេត្តពោធិ៍សាត់។ ពិធីនេះមិនត្រឹមតែជាការបំពេញបុណ្យកុសលតាមគន្លងព្រះពុទ្ធសាសនាប៉ុណ្ណោះទេ ថែមទាំងបានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំចំពោះវិស័យសាសនា និងការចូលរួមចំណែកក្នុងការកសាងសមិទ្ធផលក្នុងទីអារាម។ យោងតាមការអញ្ជើញចូលរួម និងគោលបំណងនៃពិធី អង្គកឋិនទានមហាសាមគ្គីនេះ ត្រូវបានរៀបចំឡើងក្រោមការដឹកនាំរបស់ឯកឧត្តម សុខប្រសិទ្ធិ និងមានការអញ្ជើញចូលរួមពីសំណាក់ថ្នាក់ដឹកនាំសំខាន់ៗមួយចំនួនទៀត រួមមាន៖ ឯកឧត្តម ពៅ ផនសំណាង អនុរដ្ឋលេខាធិការក្រសួងព័ត៌មាន និង ឧត្តមសេនីយ៍ទោ គ្រួច ឡា នាយករងទីចាត់ការបំភ័ន្តអក្ខរៈអគ្គបញ្ជាការ និងលោកជំទាវ ព្រមទាំងមានការនិមន្ត និងអញ្ជើញចូលរួមពីសំណាក់ព្រះមេគណខេត្ត ព្រះចៅអធិការវត្ត ព្រះមន្ត្រីសង្ឃ អាជ្ញាធរមូលដ្ឋាន និងពុទ្ធបរិស័ទជិតឆ្ងាយយ៉ាងច្រើនកុះករ។ គោលបំណងសំខាន់នៃពិធីបុណ្យកឋិនទាននេះ គឺដើម្បីវេរប្រគេននូវត្រៃចីវរ និងទេយ្យទាននានាដល់ព្រះភិក្ខុសង្ឃដែលគង់ចាំព្រះវស្សាអស់ត្រីមាស ហើយក៏ដើម្បីប្រមូលបច្ច័យសម្រាប់ទ្រទ្រង់ និងកសាងសមិទ្ធផលបន្ថែមទៀតនៅក្នុងបរិវេណវត្តផងដែរ។ តាមរយៈពិធីនេះ ឯកឧត្តម និងថ្នាក់ដឹកនាំទាំងអស់បានបង្ហាញនូវសទ្ធាជ្រះថ្លា និងការប្តេជ្ញាចិត្តក្នុងការចូលរួមលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ។ កម្មវិធីប្រព្រឹត្តទៅតាមគន្លងប្រពៃណី កម្មវិធីបុណ្យកឋិនទាននេះ បានប្រព្រឹត្តទៅរយៈពេលពីរថ្ងៃគឺ៖ 👉 ថ្ងៃសៅរ៍ ទី០១ ខែវិច្ឆិកា ឆ្នាំ២០២៥ (វេលារសៀល): ពិធីបានចាប់ផ្ដើមឡើងដោយការប្រារព្ធពិធីក្រុងពាលី ធ្វើបទនមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និងសម្តែងព្រះធម៌ទេសនា ដើម្បីជាការប្រសិទ្ធពរជ័យ និងសិរីសួស្តី។ 👉ថ្ងៃអាទិត្យ ទី០២ ខែវិច្ឆិកា ឆ្នាំ២០២៥ (វេលាព្រឹក): មានការប្រគេនយាគូដល់ព្រះសង្ឃ វេអង្គកឋិនទាន និងដង្ហែរអង្គកឋិនទានមហាសាមគ្គីប្រទក្សិណ ៣ជុំវិញព្រះវិហារ មុននឹងវេរប្រគេនដល់ព្រះសង្ឃដែលគង់ចាំវស្សាគ្រប់ត្រីមាស។ ការដង្ហែអង្គកឋិនទានប្រព្រឹត្តទៅយ៉ាងអធិកអធម្ម រីករាយក្រៃលែង ពោរពេញដោយសំឡេងភ្លេងពិណពាទ្យ និងក្ដីជ្រះថ្លារបស់ពុទ្ធបរិស័ទ។ 👉 សង្ឃដីកា និងសារៈសំខាន់នៃបុណ្យកឋិន ពាក់ព័ន្ធនឹងពិធីបុណ្យនេះ ព្រះមេគណខេត្ត បានមានសង្ឃដីកាថា បុណ្យកឋិនទានគឺជាពិធីបុណ្យមួយដែលចាប់ផ្ដើមធ្វើបន្ទាប់ពីបុណ្យចេញវស្សា ហើយតែងតែត្រូវបានដង្ហែចូលគ្រប់ទីអារាមទាំងអស់ ដោយពុំមានវត្តណាមួយត្រូវបានខកខានឡើយ ក្នុងអំឡុងពេលចាប់ពីថ្ងៃ ១រោច ខែអស្សុជ ដល់ថ្ងៃ ១៥កើត ខែកត្តិក។ បុណ្យកឋិនទានមានគោលបំណងសំខាន់ៗរួមមាន៖ - ដើម្បីបង្កើតនូវសាមគ្គីភាព រវាងបុគ្គល គ្រួសារ និងសង្គមជាតិទាំងមូល។ -ដើម្បីទ្រទ្រង់ព្រះពុទ្ធសាសនា ឲ្យបានចម្រើនរុងរឿងយូរអង្វែងតទៅមុខទៀត។ -ដើម្បីផ្តល់នូវកម្លាំងកាយចិត្ត និងឧបការៈទំនុកបម្រុងឧបត្ថម្ភដល់ព្រះភិក្ខុសាមណេរដែលជាអ្នកបន្តពូជពង្សសាសនា ដែលនេះជាមហាកុសលដ៏ប្រសើរ។ ពិធីបុណ្យកឋិនទានមហាសាមគ្គីនៅវត្តពោធិ៍អណ្ដែត ហៅវត្តក្បាលទាហ៊ាន ក្រោមការផ្ដើមបុណ្យដោយឯកឧត្តម សុខប្រសិទ្ធិ និងថ្នាក់ដឹកនាំខាងលើ បានប្រព្រឹត្តទៅដោយជោគជ័យ និងមហាសប្បាយរីករាយ។ ពិធីនេះបានបង្ហាញពីការរក្សាបាននូវប្រពៃណីជាតិ និងការចូលរួមចំណែកយ៉ាងសកម្មក្នុងការអភិវឌ្ឍវិស័យសាសនា តាមរយៈការប្រមូលបច្ច័យកសាងក្នុងវត្ត និងការលើកទឹកចិត្តដល់ព្រះសង្ឃដើម្បីបន្តការសិក្សា និងការប្រតិបត្តិធម៌វិន័យ។ គួររំលឹកផងដែរថា÷ អង្គកឋិនទានមហាសាមគ្គីនេះ មិនត្រឹមតែជាពិធីបុណ្យសាសនាប៉ុណ្ណោះទេ ប៉ុន្តែវាក៏ជាកញ្ចក់ឆ្លុះបញ្ចាំងពីសាមគ្គីភាពដ៏រឹងមាំរវាងថ្នាក់ដឹកនាំ ពុទ្ធបរិស័ទ និងសង្ឃ រួមគ្នាក្នុងកិច្ចការទ្រទ្រង់ព្រះពុទ្ធសាសនាដែលជាគ្រឹះនៃសង្គមជាតិខ្មែរ។ ការចូលរួមរបស់ឯកឧត្តម សុខប្រសិទ្ធិ និងថ្នាក់ដឹកនាំផ្សេងទៀត គឺជាគំរូដ៏ល្អមួយក្នុងការលើកតម្កើងតម្លៃសាសនា វប្បធម៌ និងការរួមចំណែកដល់ការអភិវឌ្ឍន៍សង្គមប្រកបដោយសេចក្តីថ្លៃថ្នូរ។