ឯកឧត្តម សួន សុម៉ាលីន អញ្ជើញជាអធិបតីក្នុងពិធីបញ្ចុះបឋមសិលា......

ឯកឧត្តម សួន សុម៉ាលីន អញ្ជើញជាអធិបតីក្នុងពិធីបញ្ចុះបឋមសិលា សាងសង់មត្តេយ្យស្តង់ដារ ក្នុងស្រុកស្វាយអន្ទរ

ព្រៃវែង៖ នៅថ្ងៃទី២២ ខែសីហា ឆ្នាំ២០២៥ ឯកឧត្តម សួន សុម៉ាលីន ប្រធានគណៈកម្មាធិការសាខាកាកបាទក្រហមកម្ពុជា ខេត្តព្រៃវែង បានអញ្ជើញជាអធិបតីក្នុងពិធីបញ្ចុះបឋមសិលា សាងសង់ អគារមតេ្តយ្យសិក្សាស្តង់ដា(គម្រោងអគារទី២) ជាអំណោយរបស់សាខាកាកបាទក្រហមកម្ពុជានេះមានចំនួន ១ខ្នង ស្មើនឹង ៤បន្ទប់ ដែលមាន បណ្តោយ ៣២ ម៉ែត្រ ទទឹង ១១,២ ម៉ែត្រ កំពស់ ៤,១ ម៉ែត្រ។ ក្នុងពិធីនោះក៏មានការអញ្ជើញចូលរួមពីសាខាកាកបាទក្រហមកម្ពុជា គណៈកម្មាធិការសាខាខេត្ត ប្រតិភូអមដំណើរ ក្រុមប្រតិបត្តិសាខា លោក ប៉ិច សុង ប្រធានគណៈកម្មាធិការអនុសាខាស្រុកស្វាយអន្ទរ មន្ត្រីប្រចាំការអនុសាខា ក្រុមកាកបាទក្រហមឃុំ គណៈកម្មការសាលា នាយក លោកគ្រូ-អ្នកគ្រូ សាលាបឋមសិក្សា សឿ យ៉ាត ពោធិ៍ជ្រៃ អ្នកស្ម័គ្រចិត្តភូមិ ទីប្រឹក្សាយុវជន យុវជនកាកបាទក្រហមកម្ពុជា ប្រជាពលរដ្ឋ ក្រុមម៉ៅការសំណង់ និងសិស្សានុសិស្ស សរុបអ្នកចូលរួមចំនួន ២៣០នាក់ ស្រី ១៣០នាក់។

ចំពោះពិធីបញ្ចុះបឋមសិលា សាងសង់អគារមតេ្តយ្យសិក្សាស្តង់ដា(គម្រោងអគារទី២) ជាអំណោយរបស់សាខាកាកបាទក្រហមកម្ពុជា គឺជាចំណងដៃថ្មីដើម្បីឆ្លើយតបទៅនឹងចំនួនសិស្ស ដែលមានការកើនឡើងជារៀងរាល់ឆ្នាំ និងបានរួមចំណែកដ៏ថ្លៃថ្លា ក្នុងការជួយលើកកម្ពស់ដល់ការ សិក្សាអប់រំ ក៏ដូចជាគុណភាពនៃការអប់រំនៅកម្ពុជា ស្របតាមគោលនយោបាយរបស់រាជដ្ឋាភិបាល នីតិកាលទី៧ នៃរដ្ឋសភាក្រោមការដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណ ដោយបានចាត់ទុកការអភិវឌ្ឍនធានមនុស្ស ជាអាទិភាពទី១ ដែលនៅក្នុងយុទ្ធសាស្ត្របញ្ចកោណដំណាក់កាលទី១ របស់ក្រសួងអប់រំ យុវជន និងកីឡា នឹងបន្តការធ្វើកំណែទម្រង់វិស័យអប់រំ ដោយផ្តោតលើគុណភាពអប់រំគ្រប់កម្រិតសិក្សា ជំរុញការអប់រំឌីជីថល បង្កើនការចូលរៀនផ្នែកវិទ្យាសាស្ត្រ និងបច្ចេកវិទ្យា ពង្រឹងការបណ្តុះបណ្តាលជំនាញដល់យុវជន ពង្រឹងការអប់រំកាយ និងកីឡា ការអប់រំសុខភាព និងភាពជាពលរដ្ឋពេញលេញ៕